Il racconto del weekend calcistico isolano in Limba Sarda a cura degli amici di Amistade.
Casteddu tuccàt bene meda, pustis si pèrdet
Bene meda tuccàt su Cagliari, donende a sa tzente sua s’illusione de podere cumandàre sa gara a piaghere sou. Est die bona pro Piccoli, isse fùit dae sa mesania, rùpit in area e bidet a manca Augello chi li torrat su donu cun unu cross galanu e Piccoli no perdonat. S’isconchinada pretzisa e galàna pasat sa bòccia intro su saccu. Isponet su primu tempus 1-0 pro Casteddu cun meritu mannu, nudda potet narrere Bologna. In su segundu tempus totu mudat, abbastat una faddina de Felici, chi toccat s’anca de Cambiaghi chena gurpa,
ne bisonzu. S’arbitro est incue e no bi pensat duas bortas: rigore. Sinnat Orsolini , chi deghe minutos infàtu tancat sos contos. Solu in area accoglit un’assit de Cambiaghi. Luvumbo aggabat su campu, istraccu e male còntzu e sos sardos no agatànt pius sa perdida atza. Pro su Bologna est tando unu giogu, intendende sunùscu de sa champion. Casteddu pènat e abbaidat cun sentidu timore su cabu e giosso, isetende como su Genoa, chi faghet a proa de importu mannu.
Torres torràt a pè in terra, còntra sa Ternana
Oe est toccadu a sa Torres de proare s’amargùra de su mossu ranchidu. Sa partida ‘e Terni, segunda in classifica, potiat donare sa possibilidàde de s’impresa manna, cussa de gherrare pro sa serie B deretta. Zecca at donadu s’illusione vintzente, cun rete galàna, colados mancu duos minutos dae incomintzu. Pustis pius nudda. In campu abbarràt solu sa Ternana, meres de domo e de totu su giogu. Como.pagu disanimu. Sa brigada tattaresa bi la potet galu faghere, su tempus b’est, forsis solu in playoff, chena perdere àtza e bàlia.
Olbia bìnchet sa prima finale, fòra ‘e domo…3-1
Partida cuntzàda in su primu tempus pro s’Olbia in Campania, còntra sa Puteolana, 2-0 , gratzias a un’eurogol de Maspero, pustis chi Leone àiat tèntu su rigore de Ragatzu, Semper isse, Ragatzu donat sa boccia de sa segunda rete a De Grazia, ch’isbatzinat dae fora ‘e area, trampende Leone. In su segundu tempus sos terranoesos sighint a cumandare sa gara, e tando accudìt puru sae tres…bi pensat Costanzo cun una rete de ammentare, chi lassat Leone mudu e chietu. Sa Pautelana sinnat sa rete de s’onore a su minutu 78, cu un’isconchinada galàna de Russo. Devimus pensare chi Puteolana est cuinta cun 43 puntos còntra sos 30 de sos sardos. Eppùru Olbia at bogadu a pizu ideas e capitzidàde de giogu superiore a sos campanos e como abbaidat sa coa dae attesu. Custu no devet semenare illusiones, ma Olbia potet pensare cun animu nou a sas finales ch’abbarrant, dae como fintzas a sa fine.
Mario Bua Capitta, Amistade
