Il racconto del weekend calcistico isolano in limba sarda a cura degli amici di Amistade.
Su Casteddu b’est ma no collit nudda: 1-2 e sos tres puntos abarrant in Lombardia
Su Casteddu agatat s’atacu ma perdet sa difesa. Su discu est semper cussu, semper su matessi. E puru amus su menzus bardianu de su cambale, amus puru unu pitzinnu Uruguaianu, Rodriguez chi garantit una bona resa e ammentat àteros mannos, chi tucados dae cussa matessi terra, ant giumpadu su mare pro acudire a Sardigna. E pustis, namus puru chi su mastru est unu chi sa difesa l’at praticada e la connoschet. Como devet acontzare su bàrriu, ca sa classìfica torrat a oriolare. In sa New Balance Arena amus pèrdidu sa partida, gioghende menzus de sos bergamascos pro totu su segundu tempus. E custu est su cabu bonu e su cabu malu de sa chistione. Pitzinnos puzones comente Esposito e Palestra, cun sa maestria semper prus pesuda in sa mesania de unu casteddaju doc comente Deiola, e unu napoletanu, Gaetano, donant unu sentidu de bonu colore a su tempus benidore, semper chi imparemus a non pèrdere sos frutos chi su campu nos donat, in de badas. Ca sa sèrie A non perdonat. E sos àrbitros italianos prus pagu puru.
Sa Torres est torrende a su connotu
Mancat semper su bomber e si bidet, ma torrant nòdidos sinnos de mezoru. Sos de su Gubbio, in su campu issoro, ant dèvidu difèndere cun oriolu mannu su 0-0, gioghende in deghe s’ùrtima parte de sa partida chi sa Torres aiat àpidu meritadu de bìnchere. Sos umbros sunt in su logu 13 de sa classìfica, 9 puntos a in antis a sos sardos, chi abarrant ùrtimos. Su 2025 est rupende in s’istòria, mancat solu una gara, nos isetat unu 2026 in ue diat èssere netzessàriu de mudare su passu.
Die de ierru de sa sèrie D sarda
Solu su Latte Dolce perdet contras a su Cassino, su Budoni non resessit a bìnchere in domo sua contras a su Flaminia (0-0) e s’Òlbia leat duos tzafos in domo de s’Anzio. Solu su Monastir achipit a unu 2-2 in su de Nocerina. Sa Scafatese abarrat capu lista cun 36 puntos, prima de sas sardas est su Budoni, cuartu a 28 puntos.
Mario Bua Capitta, Amistade (cun su contivizu de s’Istituto Chircas)
