Ierru primadiu pro sas iscuadras sardas de A, C e D. Solu sa Torres mantenet in parte sa promissas fattas e mancari chena binchere potet gustare aria de chelu. Sa gara cun Pineto no fit pro nudda fatzile e s’ischiat. Tando sos istranzos ant sinnadu puru a primu cun Bruzzaniti a su minutu 31 e sa gara est tuccada in pigada pro sos tattharesos. Su Pinedo at mantesu sa bòccia pro meda tempus, gratzias a un’idea de giogu nòdida e una balia atletica de invidiare. Ma est in sa difficultàde chi pigant a pizu sos valores beros de omines e iscuadras. Sa torres at giogadu cun sabiesa, chena timore e Fischnaller at proadu a mudare su destinu, apparinende a su minutu 58, cund’una rete de ammentare e accurtziendesi a su 2-1, semper isse, cun un’isbatzinada de tiru dae manca, chi solu unu bardianu mannu comente Tonti podiat tennere. Torres devet galu tribagliare, su mastru l’ischit, s’iscuadra puru, ma s’assotziu paret a-unidu. Tando si potet bisare.
In Casteddu mancant e meda puru Nandez e Dossena, ma su passadu no torrat pius. Nicola potet ajuare ma sas magìas no, b’at pagu ‘e ite faghere, mancari in passadu at semper agatadu brios in sos mamento de difficultàde. Empoli, iscuadra de provintzia, chi in istadiale at perdidu mastru e capitanu, tuccados a Casteddu, at donadu a sa gara tempus e tramas de giogu superiores, meritende sa bìnchida e Casteddu s’est lassadu rùere chena gherrare meda. Como sos sardos sunt urtimos in classifica, puru si su campionadu est solu incomintzadu. Su caminu est longu e su barriu si potet accontzare, cun su tribagliu narat su mastru. Ma pro resessire in s’opera de remediu, impitamus un’omine chi potat leare sa mesania a manu tenta e unu bomber pius forte de sa sorte, unu chi cando retzit sa bòccia in area che la pònnet intro sa porta e bò. Chie tando?..
Olbia perdet sa segunda gara intron ‘e domo, una fatu a s’àtera. Tando nos preguntamus cun ispantu, cale domo e de chi est abbèru su mere. Amus giogadores chi no connoschent Terreanoa e Terranoa no connoschent a issos, ca no faeddamus sa matessi limba. Sa die ch’imparant a comprendere su logu, devent totu torrare a domo issoro. E sos piseddos nostros? cussos chi donant s’anima, su coro e s’ischire in totu sos campos de s’isola? Una ‘ia los abbaidaimus mudende dae pitzinnos a omines, prima ‘e tuccare a sighire sos bisos issoro in sos campos mannos de su continente. E oe?..Como no est fatzile a narrere nudda, toccat de a-unire brios e pensare a fùere dae s’inferru de sa classifica, Olbia 1905 no devet morrere, ca fintzas a duos annos passados fit sa segunda capitale de de sa fùbbal sarda.
Mario Bua Capitta, Amistade
