Napoli torrat Casteddu a pè in terra. Lecce aiat sonadu sa trumba avvisende-nos innanti, ma cussa fi àtera gara. Como Napoli donat a sos sardos sa mesùra chi pius s’accurtziat a beridàde. Pruite tando? Ponimula gasì: Casteddu at giogadu sa bòcia pro bona parte de sa gara, at toccadu sa linna de sa porta tre bortas, su bardianu napoletanu fit forsis su metzus de totu sos omines in campu. E puru amus perdidu 4-0- Tando ite semus nende o cherimus narrere?..? ‘Eo naro chi tra Napoli e Casteddu mudat su livellu tecnicu de sos giogadores. Totu faghent o bochint giogiu, cun tramas e pressing, connottos dae totu. Sa giogada de su campione però, la potet donare su campione solu, siat isse Lukaku o Kvratskhelia. Custu cheret narrere chi casteddu cun su campu minore e sas busciàcas boidas, potet solu pensare a su segundu campionadu, la potimus giamare serie A2, inue si potet solu gherrare pro si salvare dae sa rùtta in B, cun balia, curagiu e dignidade. Cuss’est s’iscudeto poddibile pro Casteddu e s’iperu Biu. Su mastru est bonu abberu e sos sardos, mancari pagos sun tot’unidos pro Casteddu.
Olbia apparinàt a sa fine una gara chi pariat pèrdida pro semper, cando sos tattaresos de Latte Dolce fùint binchende cun nòdidu meritu, gratzias a sas retes de Odianose e s’esordiente Ruggiu, faddendesi puru su rigore de sa terza rete, gratzias a sa parada manna de su bardianu nou, Di Chiara. Tando cando unu pensat chi su mediu no at pius brios né isperu, tot’in unu sos terranoesos agatànt su siddadu, una semida ‘ona pro giompere a sa paridàde. Tra su minutu 23 e sue26 de su segundu tempus, bi pensant prima Mari Sainte e pustis Costanzo a apparinare sa gara. Abbarrant duos sentìdos, sa delusione de sos tattaresos, superiores comente iscuadra e s’isperu nou de sos olbiesos, chi colant sa tempesta mala e resessint a torrare in poltu seguru. Latte dolce, mancari in tristesa pro duos puntos perdidos, narat e cumprendet chi potet bolare altu In su girone sou de sa serie D. Olbia devet ponnere umpare totu sos limbatzos divessos de un’assotziu c’ammentat Babilonia e ajuare s’arrejinu tra s’iscuadra e su logu. No est fatzile, ma si potet.
Sa Torres est in caminu e in caminu cheret abbarrare. Gasì narat sa gara de Dominiga, binchida in su campu “proibidu” de Campobasso, gratzias a sa rete de su capitanu Gigi Scotto, chi dae sos undighi metros no tremat, bardianu a un’ala e bòccia a s’àtera. Sos meres de domo abbarrant in deghe pro gurpa de Baldassin, chi si lassat ammonire duas bortas e sa Torres profitat de s’omine in pius, comente metzus no si potet fàghere. Defesa bene sestada, bòccia giogàda cun classe e sabièsa, gasì comente solu un’iscuadra manna, chi connoschet sa balia sua, ischit fàghere. Tres puntos in bertulas pro recuire cuntentos a domo. E como tocat a su Milan. Niune connoschet su tempus bennidore, Sa Torres potet binchere, pareggiare o perdere puru, ma s’iscuadra b’est, su mastru puru e su desitzu ‘e gherrare abbarrat sue s’annu coladu. Tando su piattu est cundidu e Tatthari potet isperare in un’erànu isportivu nou.
Mario Bua Capitta, Amistade
